Papa Franġisku I – L-Ewwel Diskors
L-Ewwel Diskors tal-Papa Franġisku
Ħuti, il-lejla t-tajba.
Intom tafu li d-dmir tal-konklavi kien dak li jagħti Isqof lil Ruma. Jidher li ħuti l-Kardinali marru jfittxuh kważi f’tarf id-dinja. Imma issa qegħdin hawn. Nirringrazzjakom tal-merħba tagħkom. Il-komunità djoċesana ta’ Ruma għandha l-Isqof tagħha. Grazzi.
U qabel xejn, qabel xejn, nixtieq nagħmel talba għall-Isqof Emeritu tagħna, Benedittu XVI. Nitolbu għalih ilkoll flimkien biex il-Mulej ibierku u l-Madonna tħarsu.
Missierna li inti fis-smewwiet … Sliema għalik, Marija … Glorja lill-Missier …
U issa nibdew din il-mixja, l-Isqof u l-poplu, Isqof u poplu; din il-mixja tal-Knisja ta’ Ruma, li hija dik li tippresiedi bl-imħabba lill-Knejjes kollha. Hija mixja ta’ aħwa, ta’ mħabba u ta’ fiduċja bejnietna. Nitolbu dejjem għal xulxin, wieħed għall-ieħor. Nitolbu għad-dinja kollha biex ikun hemm fratellanza kbira. Nawguralkom li din il-mixja ta’ Knisja li qed nibdew illum u li fiha qed jgħinni il-Kardinal Vigarju, li qiegħed hawn preżenti, tħalli l-frott għall-evanġelizzazzjoni ta’ din il-Belt sabiħa.
U issa nixtieq nagħti l-benedizzjoni, imma qabel, qabel nitlobkom pjaċir. Qabel ma l-Isqof ibierek lill-poplu, nitlobkom biex intom titolbu lill-Mulej jberikni, it-talba tal-poplu li jitlob il-benedizzjoni għall-Isqof tiegħu. Nagħmlu fis-silenzju din it-talba tagħkom fuqi.
Hawn il-Papa Franġisku baxxa rasu għall-ftit mumenti waqt li l-folla miġbura fi Pjazza San Pietru tablet għalih fis-skiet.
U issa nagħti l-benedizzjoni lilkom u lid-dinja; lill-bnedmin kollha ta’ rieda tajba.
Imbagħad il-Papa ta l-benedizzjoni ,Urbi et Orbi lill-Belt ta’ Ruma u lid-Dinja. Wara li ndaqq l-Innu Nazzjonali Taljan u l-Innu Pontifiċju, il-Papa Franġisku reġa talab il-mikrofnu u temm jgħid …
Ħuti, inħallikom. Grazzi ħafna tal-merħba tagħkom. Itolbu għalija u niltaqgħu ma ndumux. Għada rrid immur nitlob lill-Madonna biex tħares lil Ruma kollha. Il-lejl u l-mistrieħ it-tajjeb.
Sors: www.laikos.org
