QARI TAL-LITURĠIJA TAL-ĦADD

IR-RABA’ ĦADD TA’ L-AVVENT

[SENA Ċ]

L-Ewwel Qari

[Mikea 5, 1-4a]

Qari mill-Ktieb tal-Profeta Mikea

Dan jgħid il-Mulej:
“Imma int, Betlehem ta’ Efrata,
ċkejkna fost il-familji ta’ Ġuda,
minnek għad joħroġli
dak li jkun prinċep f’Iżrael;
hu għandu l-bidu tiegħu mill-qedem,
sa minn dejjem ta’ dejjem.

Għalhekk il-Mulej jitlaqhom
sa meta teħles dik li hi fl-uġigħ tal-ħlas;
mbagħad il-bqija ta’ ħutu jerġgħu lura
fost ulied Iżrael.
U hu joqgħod jirgħa l-merħla tiegħu
bil-qawwa tal-Mulej,
bil-glorja ta’ isem il-Mulej, Alla tiegħu.

U huma jgħammru fiż-żgur,
għax issa tkun kbira setgħetu,
sa trufijiet l-art.
U dan ikun is-sliem!”

Il-Kelma tal-Mulej.
R/. Irroddu ħajr lil Alla

Salm Responsorjali

[Salm 79 (80)]

R/. Mulej, itfa’ fuqna d-dija ta’ wiċċek, u nkunu salvi

O Ragħaj ta’ Iżrael, agħti widen,
int li qiegħed fuq il-kerubini, iddi.
Qajjem il-qawwa tiegħek,
u ejja ħa ssalvana.

R/. Mulej, itfa’ fuqna d-dija ta’ wiċċek, u nkunu salvi

Erġa’ ejja, Alla ta’ l-eżerċti;
ħares mis-sema, u ara,
u żur ‘il din id-dielja.
Ħu ħsieb dak li ħawwlet lemintek,
ir-rimja li int kabbart għalik.

R/. Mulej, itfa’ fuqna d-dija ta’ wiċċek, u nkunu salvi

Ħa tkun idek fuq il-bniedem ta’ lemintek,
fuq il-bniedem li int saħħaħt għalik.
Aħna ma nitbegħdux minnek;
roddilna l-ħajja, u aħna nsejjħu ismek.

R/. Mulej, itfa’ fuqna d-dija ta’ wiċċek, u nkunu salvi

It-Tieni Qari

[Lhud 10, 5-10]

Qari mill-Ittra lill-Lhud

Ħuti, Kristu meta daħal fid-dinja qal:
“Sagrifiċċju  u offerta int ma ridtx,
imma ġisem int ħejjejt għalija;
vittmi  maħruqa  u  vittmi   għad-dnubiet
lilek ma għoġbukx.
Jien  imbagħad  għedt: ‘Hawn  jien,  ġejt
biexnagħmel ir-rieda tiegħek, O Alla,
kif fil-ktieb hemm miktub fuqi.”

L-ewwel qal: “Sagrifiċċji u offerti, vittmi maħruqa u vittmi għad-dnubiet, la ridthom u lanqas għoġbuk”, għalkemm dawn titlobhom il-Liġi.Mbagħad qal: “Hawn jien, ġejt biex nagħmel ir-rieda tiegħek.” B’hekk Alla neħħa s-sagrifiċċji ta’ l-ewwel biex iqiegħed flokhom tat-tieni.Bis-saħħa ta’ din ir-rieda aħna konna mqaddsin, permezz ta’ l-offerta tal-ġisem ta’ Ġesù Kristu magħmula darba għal dejjem.

Il-Kelma tal-Mulej.
R/. Irroddu ħajr lil Alla

Akklamazzjoni qabel l-Evanġelju

Hallelujah.
R/. Hallelujah.

Ara, jiena l-qaddejja tal-Mulej:
ħa jsir minni skont kelmtek!

R/. Hallelujah.

L-Evanġelju

[Lq 1, 39-45]

Qari mill-Evanġelju skont San Luqa

F’dak il- ġranet Marija qamet u marret tħaffef lejn l-għoljiet, f’belt tal-Lhudija.

Daħlet għand Żakkarija u sellmet lil Eliżabetta. Malli Eliżabetta semgħet lil Marija ssellmilha, it-tarbija qabżet fil-ġuf tagħha u Eliżabetta mtliet bl-Ispirtu s-Santu; u nfexxet f’għajta kbira u qalet: “Mbierka inti fost  in-nisa, u mbierek il-frott tal-ġuf tiegħek! U minn fejn ġieni dan li omm il-Mulej tiegħi tiġi għandi? Għax ara, malli smajt f’widnejja leħen it-tislima tiegħek, it-tarbija li għandi fil-ġuf qabżet bil-ferħ. Iva, hienja dik li emmnet li jseħħ kull ma bagħat jgħidilha l-Mulej!”

Il-Kelma tal-Mulej.
R/. Tifħir lilek Kristu

Niżżel it-test bħala pdf. [Sors: www.liturġijamalta.org]

QARI TAL-LITURĠIJA TAL-ĦADD

IT-TIELET ĦADD TA’ L-AVVENT

[SENA Ċ]

L-Ewwel Qari

[Sof 3, 14-18a]

Qari mill-Ktieb tal-Profeta Sofonija

Għajjat bil-ferħ ta’ qalbek, bint Sijon,
Iżrael, samma’ leħnek!
Infexx fl-hena u ifraħ b’qalbek kollha, bint Ġerusalemm!
Neħħa l-Mulej minn fuqek is-sentenza li kellek kontrik,
keċċa l-għedewwa tiegħek.
Is-sultan t’Iżrael, il-Mulej, hu f’nofsok;
ma jkollokx iżjed ħsara minn xiex tibża’.

Dakinhar jgħidu lil Ġerusalemm:
“Tibżax, Sijon,
tħallix idejk jintelqu!
Il-Mulej, Alla tiegħek, qiegħed f’nofsok,
gwerrier li jsalva;
minħabba fik jithenna b’hena kbir,
fi mħabbtu jġeddek,
jinfexx minħabba fik f’għajat ta’ ferħ,
bħalkieku f’jum ta’ festa.

Il-Kelma tal-Mulej.

R/. Irroddu ħajr lil Alla

Salm Responsorjali

R/. Kbir hu f’nofsok il-Qaddis ta’ Iżrael

Alla s-salvazzjoni tiegħi,
jiena nittama u ma jkollix mniex nibża’.
Għax qawwieti u għanjieti hu l-Mulej,
għalija sar is-salvazzjoni.
Kollkom ferħana
timlew l-ilma mill-għejun tas-salvazzjoni.

R/. Kbir hu f’nofsok il-Qaddis ta’ Iżrael

“Roddu ħajr lill-Mulej, sejjħu ismu,
għarrfu lill-ġnus bl-għemejjel tiegħu,
xandru li ismu huwa fl-għoli.

R/. Kbir hu f’nofsok il-Qaddis ta’ Iżrael

Għannu lill-Mulej għax għamel ħwejjeġ kbar;
ħa jkun dan magħruf ma’ l-art kollha.
Aqbeż bil-ferħ, għanni,
int li tgħammar f’Sijon,
għax kbir hu f’nofsok il-Qaddis ta’ Iżrael!”

R/. Kbir hu f’nofsok il-Qaddis ta’ Iżrael

It-Tieni Qari

[Fil 4, 4-7]

Qari mill-Ewwel Ittra ta’ San Pawl Appostlu lill-Filippin

Ħuti, ifirħu dejjem fil-Mulej; nerġa’ ngħidilkom, ifirħu. Il-ħlewwa tagħkom, ħa jkunu jafuha l-bnedmin kollha. Il-Mulej qorob!

Tħabbtu raskom b’xejn. Fit-talb kollu tagħkom itolbu u uru lil Alla xi jkollkom bżonn, u iżżuh ħajr.

U s-sliem ta’ Alla, sliem li jgħaddi kull ma l-moħħ jista’ jifhem, iżommilkom qalbkom u moħħkom sħaħ fi Kristu Ġesù.

Il-Kelma tal-Mulej.
R/. Irroddu ħajr lil Alla

Akklamazzjoni qabel l-Evanġelju

Hallelujah.
R/. Hallelujah.

L-ispirtu ta’ Sidi l-Mulej fuqi,
għax il-Mulej ikkonsagrani, biex inwassal il-bxara t-tajba lill-fqajrin.

Hallelujah.

L-Evanġelju

[Lq 3, 10-18]

Qari mill-Evanġelju skont San Luqa

F’dak iż-żmien, in-nies kienu jistaqsuh u jgħidulu: “Mela x’għandna nagħmlu?” U huwa kien iweġibhom: “Min għandu żewġ ilbiesi, jaqsam ma’ min ma għandu xejn, u min għandu x’jiekol jagħmel l-istess.”

Resqu wkoll xi pubblikani biex jitgħammdu u qalulu: “Mgħallem, x’għandna nagħmlu aħna?” U huwa weġibhom: “Tissikkaw lil ħadd biex jagħtikom taxxi iżjed milli jmisskom tieħdu.”

Staqsewh ukoll xi suldati u qalulu: “U aħna, x’għandna nagħmlu?” U huwa weġibhom: “Tisirqu lil ħadd bit-tehdid jew bil-qerq tagħkom, u kkuntentaw ruħkom bil-paga li għandkom.”

Il-poplu kien qiegħed jistenna ħerqan, u kulħadd kien jistaqsi lilu nnifsu dwar Ġwanni, jekk kienx hu l-Messija. Għalhekk Ġwanni qabad u qal lil kulħadd: “Jien, ngħid għalija, ngħammidkom bl-ilma, imma ġej wieħed aqwa minni, li ma jistħoqqlix inħollu l-qfieli tal-qorq tiegħu. Hu jgħammidkom bl-Ispirtu s-Santu u n-nar. Il-midra qiegħda f’idu, biex iderri l-qiegħa u jiġbor  il-qamħ fil-maħżen tiegħu, imma t-tiben jaħarqu b’nar li ma jintefiex.”

U b’ħafna twissijiet oħra kien ixandar lill-poplu  l-bxara t-tajba.

Il-Kelma tal-Mulej.
R/. Tifħir lilek Kristu

Niżżel it-test bħala pdf. [Sors: www.liturġijamalta.org]

L-ewwel minn tlett riflessjonijiet fuq l-Avvent u t-tlett persunaġġi bibbliċi: Marija, Ġwanni l-Battista u Isaija -

Ir-riflessjonijiet tal-lum titratta fuq l-Avvent u Marija. Riflessjoni minn Fr Martin Cilia mssp.

Klikkja hawn isfel biex tisma. Tista anke tniżżel il-file (format: mp3) u tisimgħu iktar tard!

QARI TAL-LITURĠIJA TAL-ĦADD

IT-TIENI ĦADD TA’ L-AVVENT

[SENA Ċ]

L-Ewwel Qari

[Baruk , 1-9]

Qari mill-Ktieb tal-Profeta Baruk
Neħħi minn fuqek, Ġerusalemm, ilbies il-vistu u n-niket tiegħek,
u ilbes għal dejjem id-dija tal-glorja ta’ Alla.
Ilbes mantar il-ġustizzja ta’ Alla,
qiegħed fuq rasek id-dijadema tal-glorja ta’ Alla ta’ dejjem.
Għax Alla għad juri sbuħitek lid-dinja taħt  ix-xemx,
Alla jsemmik għal dejjem:
“Sliem tal-Ġustizzja u Glorja tal-Qima ta’ Alla.”

Qum, Ġerusalemm, itla’ fl-għoli, u ħares madwarek lejn il-lvant,
ara ‘l uliedek miġmugħa, minn fejn tinżel ix-xemx sa fejn titla’,
għall-kelma tal-Qaddis, ferħana li Alla ftakar fihom.
Telqu mingħandek bil-mixi, imkarkra mill-għedewwa,
u issa Alla se jġibhomlok,
merfugħin fil-ġieħ bħalkieku fuq tronijiet is-slaten.

Għax Alla ordna; jitniżżlu l-muntanji għolja, u l-għoljiet ta’ dejjem,
jimtlew il-widien u titwitta l-art,
biex hemm Iżrael jimxi ‘l quddiem, bla tfixkil ta’ xejn,
taħt il-ħarsien ta’ Alla.

U l-foresti u s-siġar tal-fwieħa, jixħtu dellhom għal fuq Iżrael,
bl-ordni ta’ Alla.
Għax Alla jmexxi lil Iżrael ferħan,
b’dawl il-glorja tiegħu,
msieħba mill-ħniena u l-ġustizzja ħierġa minnu.

Il-Kelma tal-Mulej.
R/. Irroddu ħajr lil Alla

Salm Responsorjali

[Salm 125 (126)]

R/. Kbir f’għemilu l-Mulej magħna!

Meta l-Mulej reġġa’ lura l-imjassra ta’ Sijon,

konna qisna mitlufa f’ħolma;
Imbagħad bid-daħk imtela fommna,
u bl-għajat ta’ ferħ ilsienna.

R/. Kbir f’għemilu l-Mulej magħna!

Imbagħad bdew jgħidu fost il-ġnus:
“Kbir f’għemilu l-Mulej magħhom!”
Kbir f’għemilu l-Mulej magħna!
U aħna bil-ferħ imtlejna.

R/. Kbir f’għemilu l-Mulej magħna!

Biddel, Mulej, xortina
bħall-widien tan-Negeb!
Dawk li jiżirgħu fid-dmugħ
jaħsdu bl-għana ta’ ferħ.

R/. Kbir f’għemilu l-Mulej magħna!

Huma u sejrin, imorru jibku,
iġorru ż-żerriegħa għaż-żrigħ.
Iżda huma u ġejjin lura,
jiġu b’għana ta’ ferħ, iġorru l-qatet f’idejhom.

R/. Kbir f’għemilu l-Mulej magħna!

It-Tieni Qari

[Fil 1, 4-6.8-11]

Qari mill-Ewwel Ittra ta’ San Pawl Appostlu lill-Filippin

Ħuti, nitlob dejjem ferħan fit-talb tiegħi għalikom,minħabba s-sehem li intom ħadtu fix-xandir ta’ l-Evanġelju, mill-ewwel jiem sa llum.Jiena żgur minn dan: li dak li beda din l-opra tajba fikom, iwassalha għat-tmiem tagħha sa ma jasal il-jum ta’ Kristu Ġesù.

Iva, jixhidli Alla kemm jien miġbud lejkom bil-qalb ta’ Kristu Ġesù!U jien dan nitlob: li l-imħabba tagħkom tikber u toktor dejjem iżjed bl-għerf u b’kull dehen,biex tistgħu tagħrfu tagħżlu l-aħjar, u mbagħad tkunu safja u bla ebda ħtija fil-jum ta’ Kristu,mimlijin bil-frott tal-ġustizzja li ġejja permezz ta’ Ġesù Kristu, għall-glorja u l-foħrija ta’ Alla.

Il-Kelma tal-Mulej.
R/. Irroddu ħajr lil Alla

Akklamazzjoni qabel l-Evanġelju

Hallelujah.
R/. Hallelujah.

Ħejju t-triq tal-Mulej,
iddrittaw il- mogħdijiet tiegħu:
u l-bnedmin kollha jaraw is-salvazzjoni ta’ Alla.

R/. Hallelujah.

L-Evanġelju

[Lq 3, 1-6]

Qari mill-Evanġelju skont San Luqa

Fis-sena ħmistax tal-ħakma ta’ Tiberju Ċesari, meta Ponzju Pilatu kien gvernatur tal-Lhudija, Erodi tetrarka tal-Galilija, ħuh Filippu tetrarka ta’ l-artijiet ta’ l-Iturija u t-Trakonija, u Lisanja tetrarka ta’ Abileni, fiż-żmien meta l-uffiċċju ta’ qassis il-kbir kien f’idejn Anna u Kajfa, il-kelma tal-Mulej ġiet fuq Ġwanni bin Żakkarija, fid-deżert.

U ġie fl-inħawi kollha ta’ madwar il-Ġordan, ixandar magħmudija ta’ ndiema għall-maħfra tad-dnubiet, kif hemm imniżżel fil-ktieb tal-profeziji ta’ Isaija:

‘Leħen ta’ wieħed jgħajjat fid-deżert:
Ħejju t-triq tal-Mulej,
iddrittaw il-mogħdijiet tiegħu.
Kull wied jimtela,
kull muntanja u għolja titbaxxa,
il-mogħdijiet mgħawwġa jiddrittaw,
u t-triqat imħarbta jitwittew.
U l-bnedmin kollha jaraw is-salvazzjoni ta’ Alla!”

Il-Kelma tal-Mulej.
R/. Tifħir lilek Kristu

Niżżel it-test bħala pdf. [Sors: www.liturġijamalta.org]